126
Блекбери, Самсунг и ИБМ влегуваат во интересна соработка, која има една цел – создавање на еден од најбезбедните таблети. СекуТАБЛЕТ, како што e неговото име, е базиран на Самсунг Таб Ес 10.5 и ќе биде достапен за купување уште ова лето. Уредот поседува специјална технологија за енкрипција, наречена Секусмарт. Во средината на минатата година Блекбери ја стекна компанијата која ја развива оваа технологија.
Секусмарт веќе се користи од страна на владите на Германија и Канада, за да се обезбеди потребната заштита од хакери и малициозен софтвер. СекуТАБЛЕТ нема да биде достапен за пошироката јавност. Таблетот има сосема јасна таргет група – „државниот и меѓународниот сектор и трговски корпорации„, пишуваат од ГСМарена.
Интересно е дека безбедниот таблет ќе им овозможи на сопствениците да користат и популарни социјални мрежи и апликации за размена на текстуални пораки – Фејсбук, Твитер и ВатсАп. Од ИБМ обезбедија софтвер кој му овозможува на корисникот да го раздели на безбеден начин работниот процес од личните апликации кога го користи таблетот.
Самсунг Таб Ес 10.5 е опремен со 10.5-инчен Супер АМОЛЕД дисплеј (2560×1600 пиксели), 8-јадрен процесор Ексинос 5420, 3 ГБ РАМ и 32 ГБ внатрешна меморија.