Дали администрацијата на Џозеф Бајден, кој за неколку недели ќе му го отстапи претседателството на Доналд Трамп, може да се погрижи Украина да биде во посилна позиција до промената на власта во САД?
Одговарајќи на ова прашање, американскиот државен секретар Ентони Блинкен рече дека главната работа е направена: „Украина сè уште постои, иако Русија се обиде да ја уништи. Путин не успеа. Украина се држи. И верувам дека има извонреден потенцијал не само да опстане туку и да напредува во иднина. А тоа зависи од одлуките што ќе ги донесе следната американска администрација и многу други земји“, објасни Блинкен во интервју за „Њујорк тајмс“.
Зборувајќи за изгледите за дипломатско решение на конфликтот, Блинкен истакна дека американските власти активно го барале тоа во времето на Бајден.
„Доколку постоеше каква било можност да се ангажираме дипломатски на начин што ќе ја заврши војната под праведни и трајни услови, ние ќе бевме првите што ќе ја искористиме. За жал, барем до овој момент, не видовме знаци дека Русија е всушност подготвена да се вклучи. Се надевам дека тоа ќе се промени“, изјави шефот на Стејт департментот, пренесува сајтот „rbc.ru“.