BMW AG бара Берлин да гласа против воведувањето значително повисоки тарифи на ЕУ за електричните возила (ЕВ) произведени во Кина, придружувајќи им се на другите германски производители на автомобили кои не се подготвени да ризикуваат судир со нивниот најважен пазар.
– Дополнителните царини им штетат на глобално активните компании во оваа земја и може да предизвикаат трговски спор од кој никој нема да има корист. Затоа, германската влада треба да заземе јасна позиција – изјави во средата извршниот директор на BMW, Оливер Зипсе.
Членките на ЕУ се подготвуваат во петок да гласаат за воведување на конечни царини од дури 45 отсто за увезените електрични возила произведени во Кина. За блокирање на тарифите е потребно квалификувано мнозинство – 15 земји-членки што претставуваат 65 отсто од населението на блокот.
Германските власти во вторникот посочија дека владата планира да се воздржи од гласањето, наместо да гласа против. Тие, исто така, очекуваат значителен број земји-членки на ЕУ да го следат примерот, што би можело да го отежне блокирањето на спроведувањето на царините.
Германскиот канцелар Олаф Шолц и францускиот претседател Емануел Макрон во среда треба да разговараат за царините во Берлин. Европската комисија, извршното тело на ЕУ, ги предложи давачките по истрагата која покажа дека Кина неправедно ја субвенционира својата индустрија за електрични возила.
Германските производители на автомобили, вклучително Volkswagen и Mercedes-Benz, се противат на царините, велејќи дека тие би можеле да наштетат на продажбата на нивниот најголем пазар на автомобили, Кина, доколку земјата возврати.