Доколку властите на Босна и Херцеговина брзо го завршат усвојувањето на два проевропски закони – за Високиот судски и обвинителски совет и за Судот на Босна и Херцеговина, а исто така изберат и главен преговарач со ЕУ, земјата може да очекува напредок во процесот на европска интеграција и закажување на првата меѓувладина конференција до крајот на годината, објавува босанското издание на регионалниот телевизиски канал N1.
Ова значи дека до крајот на годината, Босна и Херцеговина конечно би можела да добие зелено светло за самиот почеток на преговорите за членство во ЕУ.
Извори на N1 ги опишуваат односите на институциите на ЕУ со Босна и Херцеговина како разочарувачки, но додаваат дека развојот на ситуацијата во последните неколку месеци дава основа за одреден оптимизам дека земјата може да мрдне од „мртвата точка“.
Брисел верува дека отстранувањето на Милорад Додик од претседателството на босанската Република Српска обезбеди основа за нов импулс во процесот на проширување и дека тоа би можело да се конкретизира до крајот на годината.
Во август, Судот на Босна и Херцеговина ја потврди одлуката на Централната изборна комисија за прекин на претседателскиот мандат на Милорад Додик откако тој беше осуден за непочитување на одлуките на високиот претставник на меѓународната заедница во земјата. Казната на Додик е една година затвор и забрана за вршење јавна функција во траење од шест години. Тој ја откупи годината затвор, како што дозволува законот.
Судбината и брзината на европската интеграција на Босна и Херцеговина се во рацете на нејзините власти, посочуваат изворите на N1.
Босна и Херцеговина аплицираше за членство во ЕУ во февруари 2016 година и доби статус на земја-кандидат во декември 2022 година. Откако ќе се постигне потребниот степен на усогласеност со критериумите за членство, Босна и Херцеговина може да започне преговори за пристапување.
Според Дејтонскиот мировен договор, со кој заврши војната во Босна и Херцеговина (1992-1995), земјата беше поделена на два полуавтономни дела – Република Српска, населена главно со босански Срби, и Федерацијата на Босна и Херцеговина (муслиманско-хрватска федерација), населена со босански муслимани (Бошњаци) и босански Хрвати. Секој дел има своја влада, парламент и полиција, но двата се поврзани со заеднички институции на државно ниво, вклучувајќи судство, армија, безбедносни служби и даночна администрација.