Од 30 случаи со тромб забележани до 24 март, „за жал, седум починаа“, наведува британската агенција за лекови (МХРА) во изјавата проследена до агенцијата Франс Прес.
Агенцијата прецизира дека од дадените 18,1 милиони дози на вакцината, до тој датум се пријавени 22 случаи на церебрална венска тромбоза и осум други случаи на тромбоза.
„Нашата длабинска студија за овие случаи продолжува“, рече директорот на агенцијата Џун Рејн во изјавата, истакнувајќи дека сличен случај не бил пријавен за вакцината Фајзер.
„Придобивките од вакцината „АстраЗенека“ во спречувањето на инфекција со Ковид-19 и нејзините компликации сè уште ги надминуваат ризиците и луѓето треба да ја примаат вакцината кога ќе бидат поканети да го сторат тоа“, додаде таа.
Во своето мислење објавено вчера за секундарните ефекти на вакцините дадени во Велика Британија, британската агенција наведува дека „ризикот од овој вид на згрутчување на крвта е многу мал“.
Општо, агенцијата изјави дека „бројот и природата на несакани ефекти пријавени досега не се невообичаени во споредба со другите видови на вакцини кои се користат“.
Француската агенција за лекови (АНСМ) вчера објави дека од почетокот на вакцинацијата, досега се случиле 12 случаи на згрутчување на крвта во Франција по вакцинација со АстраЗенека, и вкупно четири смртни случаи од ретки форми на тромбоза.
Во средината на март, Европската агенција за лекови процени дека вакцината АстраЗенека е „безбедна и ефикасна“ и „не е поврзана“ со поголем ризик од тромбоза. Европската агенција во средата соопшти дека не открила никакви специфични фактори на ризик, како што се возраста, полот или претходните болести.