Британското Министерство за одбрана извести дека руските сили кои напредуваат од Крим се уште се обидуваат да го заобиколат Миколајев додека се обидуваат да се упатат на запад кон Одеса, додавајќи дека руските сили постигнале мал напредок во текот на изминатата недела.
„Блокадата на украинскиот брег веројатно ќе ја влоши хуманитарната ситуација во Украина, спречувајќи виталните резерви да стигнат до украинското население“, се вели во соопштението на Министерството на Твитер, пренесе Ројтерс.
Претходно, британскиот премиер Борис Џонсон вети дека ќе ја продолжи воената поддршка за Украина во телефонски разговор со украинскиот претседател Володимир Зеленски во неделата попладне.
„Премиерот ја подвлече континуираната посветеност на Обединетото Кралство да работи со меѓународните партнери за координирање на поддршката за зајакнување на самоодбраната на Украина“, се вели во соопштението на Даунинг стрит.
Двајцата лидери ја истакнаа важноста на санкциите за притисок врз рускиот лидер Владимир Путин и ги осудија бруталните напади врз невините цивили по ужасните бомбардирања на Мариупол.