Британскиот пратеник и член на Конзервативната партија Боб Сили најави дека планира да предложи закон со кој на принцот Хари и Меган Маркл ќе им се одземат титулите на војводата и војвотката од Сасекс. Нацрт-законот треба да биде готов до крајот на годината и ќе им овозможи на британските парламентарци да гласаат за давање овластување на Советот да го деградира кралскиот статус на двојката.
Сили потврди дека ќе го напише предлогот на новиот закон, само еден ден по објавувањето на документарниот филм за Хари и Меган на Нетфликс, што предизвика бес кај некои кралски фанови. Сепак, тој тврди дека размислувал за законот и пред документарецот, посочувајќи дека има „политички проблем“ со коментарите на Хари, бидејќи Хари престанал да работи како постар член на кралското семејство пред повеќе од две години.
Нему му е нејасно зошто Хари продолжил да ја користи својата титула додека ја „уништувал институцијата на монархијата и неговото семејство во исто време“.
„Покрај тоа што го уништува неговото семејство, тој напаѓа и некои важни институции во оваа земја“, рече Сили, пренесе „Скај њуз“.
На темата за потенцијалното отстранување на титулите коментираше и министерот за вработување Гај Оперман, кој е убеден дека Хари и Меган се „целосно ирелевантни“ за напредокот на Обединетото Кралство, но и на целото кралско семејство.
„Мислам дека тие се очигледно многу проблематична двојка, што мислам дека секој што ќе ги погледне може да каже колку е тажна состојбата на работите. Затоа се согласувам дека тие се целосно ирелевантни за оваа земја и напредокот на оваа земја и кралското семејство што сите ние го поддржуваме“, рече Оперман.