Унгарија повторно ќе гласа против мнозинството членки на Европската унија на денешниот лидерски самит, потврдувајќи го своето противење на забрзаниот пристап на Украина во ЕУ и испраќањето воена помош за Киев, изјави унгарскиот министер за ЕУ Јанош Бока во интервју за „Фајненшл Тајмс“.
Унгарија претходно отстапи од главната линија на ЕУ за Украина, инсистирајќи на олеснување на санкциите кон Русија и блокирање на финансиската помош од милијарди евра за Киев, тврдејќи дека санкциите само ја продолжуваат војната. Овој наратив, кој ја отсликува реториката на Кремљ, сега доби дополнителна димензија со најавата на Будимпешта дека Украина треба да стане „тампон зона“ меѓу Русија и западните одбранбени структури.
„Не ја гледаме безбедноста на Европа во интеграцијата на Украина во одбранбените системи, туку во потребата од тампон зона меѓу Русија и европските одбранбени структури, што ќе им служи на интересите и на Русија и на Европа“, рече Бока.
Тој нагласи дека Украина може да функционира како тампон зона само доколку глобалните актери, првенствено САД и Русија, постигнат консензус за нејзиниот статус. „Во спротивно, ќе остане зона на конфликт, а не тампон зона“, додаде тој.
Враќањето на Трамп и потпирањето на Унгарија на Москва
Бока дополнително објасни дека враќањето на Доналд Трамп во Белата куќа би значело дека ЕУ повеќе не треба да ја поддржува Украина воено и финансиски. Тој предупреди дека секоја унилатерална акција на ЕУ или САД во Украина без одобрение на Владимир Путин може да предизвика нови конфликти.
Политиката на Унгарија кон Украина и Русија доби на интензитет поради зближувањето на Трамп со Москва, кое, според Бока, не е само геополитички мотивирано, туку и идеолошки. „Многумина го потценуваат степенот на нетрпеливоста на администрацијата на Трамп кон европските институции. Тој ја гледа ЕУ не само како меѓународно тело со различни интереси, туку и како политички противник“, рече унгарскиот министер.
ЕУ размислува за одговор на унгарската блокада
Дипломатите од другите членки на ЕУ посочуваат дека Унгарија направила сериозно стратешко отстапување од остатокот на Унијата и дека има неформални дискусии за можностите за заобиколување на унгарското вето во процесите на одлучување.
„Континуираното противење на Украина порано или подоцна ќе има последици за позицијата на Унгарија во ЕУ“, изјави висок европски дипломат, додавајќи дека некои министри за надворешни работи на ЕУ веќе разговарале за можни санкции против Будимпешта. „Оваа дебата е започната“.
Унгарија дополнително ја зацврсти својата позиција за санкциите против Русија, сметајќи дека тие го загрозуваат мировниот процес.
„Не сакаме режимот на санкции да стане пречка за прекин на огнот и мировни преговори. Треба да разговараме за степенот до кој санкциите помагаат или попречуваат конкретен мировен процес“, заклучи Бока.