Претседателот на Бугарија Румен Радев денеска пред самитот на лидерите на ЕУ изрази очекување дека Бугарија ќе влезе во Шенген следната година и дека има намера да го отвори ова прашање денеска на самитот заедно со неговиот романски колега.
Радев рече дека Бугарија работи со Холандија и Австрија, две земји кои се противат на отворањето на Шенген зоната за Софија и Букурешт поради илегалната миграција.
Ние сме многу посветени на обезбедувањето на нашата граница, рече Радев, истакнувајќи дека тројца бугарски гранични полицајци загинаа штитејќи ја надворешната граница на ЕУ.
Австрискиот канцелар Карл Нехамер пред самитот изјави дека на Бугарија ѝ е потребна ограда, за што ѝ е потребна финансиска поддршка од ЕУ.
„Бугарскиот претседател ќе ви каже дека имаат големи проблеми. Самиот бугарски претседател вели дека е неопходно да се зајакне оградата против Турција“, додаде тој.
Земјите-членки се против изградбата на гранични огради. Нехамер смета дека треба да се скрши табуто околу оградата.
Оградите сами по себе не се ништо ново, рече Нехамер, мислејќи на бариерите на грчко-турската граница.
И еврокомесарката за внатрешни работи Илва Јохансон го критикуваше австриското вето, посочувајќи дека тоа само ѝ помага на Русија.
Нехамер смета дека е несоодветно да се поврзе руската војна во Украина со безбедносното прашање за граѓаните на ЕУ.
Холандскиот премиер Марк Руте за бугарските медиуми во Брисел изјави дека одговорот на неговата земја останува непроменет.
„Ние не велиме не. Велиме не засега“, објасни Руте и потсети дека Хаг бара уште една оценка на Европската комисија за владеењето на правото во Бугарија и се надева дека ќе биде објавена летово и е оптимист за тој извештај.
Радев денеска беше прашан за можноста во овој процес да се разделат Бугарија и Романија, на што тој одговори дека најдобар пристап е Софија и Букурешт да бидат заедно.
Радев додаде дека земјите од ЕУ и европските институции ги ценат напорите на Бугарија за заштита на границата.