Европската комисија ја заврши истрагата против субвенционирање и воведе конечни компензаторни давачки за увоз на електрични возила од Кина за период од пет години.
Како што претходно беше најавено, истрагата на Европската комисија покажа дека синџирот на вредност на електричните автомобили во Кина има корист од неправедните субвенции кои се закануваат да предизвикаат економска штета на производителите на електрични автомобили во Европската унија.
Како резултат на тоа, царинската давачка ќе стапи во сила по објавувањето во Службен весник.
Според официјалната веб-страница на Европската унија, ЕУ и Кина продолжуваат да работат на изнаоѓање алтернативни решенија кои ефикасно би ги решиле проблемите утврдени со истрагата. Комисијата останува отворена за преговори со поединечни извозници, како што е дозволено со правилата на ЕУ и Светската трговска организација.
Откако мерките стапија на сила, кинеските производители на електрични автомобили подлежат на следните тарифи:
* BYD 17 проценти
* Geely 18,8 проценти
* SAIC 35,3 отсто.
Царината за останатите фирми е 20,7 отсто. По образложеното барање за индивидуална ревизија, на Tesla ќе и биде доделена давачка од 7,8 проценти. Сите други компании кои нема да соработуваат ќе имаат царина од 35,3 отсто.
Конечните давачки ќе се наплаќаат од датумот на стапување во сила. Нема да се наплаќаат привремените давачки за увоз на електрични возила од Кина, кои беа воведени на 4 јули годинава.
Мерките ќе истечат на крајот на петгодишниот период, освен ако не се започне ревизија за истекување пред тој датум.
Да потсетиме дека истрагата ја најави претседателката на Европската комисија, Урсула фон дер Лајен, за време на нејзиниот говор за состојбата во Европската унија на 13 септември. Оваа одлука се заснова на зголемените докази за неодамнешното брзо зголемување на извозот на евтини електрични возила од Кина во ЕУ.