Цените на нафтата пораснаа и минатата недела, вторпат по ред, достигнувајќи ги највисоките нивоа оваа година, бидејќи најголемите светски производители решија да го задржат намаленото производство. На лондонскиот пазар цената на барелот минатата недела порасна за 2,4 отсто, на 90,65 долари, што е највисоко ниво од ноември минатата година.
На американскиот пазар цената на барелот се зголеми за 2,9 отсто, на 87,50 долари, највисоко ниво од септември минатата година. Порастот на цените втора недела по ред е резултат на одлуката на Саудиска Арабија и Русија да го намалат производството. Саудиска Арабија минатата недела објави дека ќе го намали производството за 1 милион барели дневно до крајот на годината, што ги изненади трговците кои очекуваа да ја продолжат одлуката за намалување на понудата само до крајот на октомври.
Русија одлучи да го намали извозот до крајот на годината за 300.000 барели дневно. Со намалување на производството, тие земји се обидуваат да одржат покачени цени на нафтата, имајќи предвид дека побарувачката слабее поради забавувањето на растот на најголемите светски економии.
Трговците се надеваа на поголема побарувачка од Кина, откако на почетокот на годината беа укинати рестриктивните мерки за ковид. Закрепнувањето на втората по големина економија во светот од корона-кризата е многу побавно од очекуваното. Растот на западните економии исто така забавува бидејќи централните банки година и пол ги зголемуваат каматните стапки за да ја потиснат инфлацијата.
Јасно е, велат аналитичарите, дека поради ова се очекува дополнително слабеење на побарувачката на нафта, па затоа се разбирливи одлуките за намалување на производството на најголемите светски производители за да се поддржат цените.
По растот две недели по ред, цените на нафтата се повисоки отколку што беа на почетокот на годината. Во однос на почетокот на годината, цената на барелот на лондонскиот пазар поскапе за повеќе од 5 отсто, а на американскиот пазар за речиси 9 отсто.