Цените на нафтата се зголемија за повеќе од еден долар во средата поради зголемената загриженост дека тензиите на Блискиот Исток би можеле да ескалираат и потенцијално да го нарушат производството на сурова нафта од регионот, по најголемиот ракетен напад на Иран врз Израел досега.
Фјучерсите на Брент скокнаа за 1 долар, или 1,36 отсто, на 74,56 долари за барел, додека американската нафта од Западен Тексас (WTI) скокна за 1,07 долари, или 1,53 отсто, на 70 долари.
За време на тргувањето во вторникот, двете одредници за сурова нафта пораснаа за повеќе од пет проценти.
Иран рано во средата објави дека неговиот ракетен напад врз Израел е завршен, а Израел и САД ветија дека ќе возвратат на Техеран бидејќи се зголемуваат стравувањата од поширока војна.
Техеран рече дека секој израелски одговор на нападот, за кој Израел вели дека вклучува повеќе од 180 балистички проектили, ќе биде дочекан со „масовно уништување“.
Советот за безбедност на Обединетите нации за среда закажа состанок за Блискиот Исток, а Европската унија повика на итен прекин на огнот.
Директното учество на членката на ОПЕК, Иран, ги зголемува шансите за прекини во снабдувањето со нафта, велат аналитичарите на АНЗ во белешката, додавајќи дека производството на нафта во земјата се искачи на највисокото ниво во последните шест години од 3,7 милиони барели дневно во август.
Панелот на министри од Организацијата на земјите извознички на нафта и нејзините сојузници, наречен ОПЕК плус, ќе се состане денеска за да го разгледа пазарот, но не се очекуваат промени во политиката, јавува Ројтерс.