Компанијата OpenAI објави дека ќе тестира реклами на својата платформа ChatGPT за корисници во Соединетите Американски Држави кои не плаќаат претплата или го користат нејзиниот нов нискобуџетен план Go, со цена од осум долари месечно.
Open AI нагласи дека рекламите нема да влијаат на одговорите што ги дава ChatGPT и дека разговорите на корисниците ќе продолжат да бидат доверливи.
Целта на воведувањето реклами, како што наведуваат, е да се поддржи поширок пристап до понапредните функции на алатката ChatGPT, а воедно да се задржи довербата што корисниците ја имаат во платформата, објавува Tech Crunch.
Во тестовите, рекламите беа поврзани со темите за разговор на корисниците, претходните интеракции и интереси.
На пример, корисниците кои истражуваат рецепти можеа да видат реклами за достава на намирници или комплети за оброци.
Рекламите нема да им се прикажуваат на лица под 18 години, ниту пак ќе се прикажуваат за чувствителни теми како што се здравје, политика или ментално здравје, тврди OpenAI.
Корисниците ќе можат да ја видат историјата на интеракција со рекламите, да ја избришат, да ги исклучат рекламите, да дадат повратни информации и да ја прилагодат персонализацијата на рекламите.
Идејата за рекламите беше дочекана со критики и потсмев, вклучително и преку реклама за „Супербоул“ од конкурентот Anthropic.
Тие прикажуваат актери кои играат ботови со вештачка интелигенција, при што Anthropic нагласува дека лошо интегрираните реклами можат да бидат досадни за корисниците.
Извршниот директор на OpenAI, Сем Алтман, го нарече Anthropic „авторитарна компанија“ и додаде дека нејзината реклама за Супербоул е „нечесна“.