Министерството за надворешни работи на Русија денеска соопшти дека четворица Руси со израелско државјанство се убиени во зоната на палестинско-израелскиот конфликт, а шестмина Руси се водат за исчезнати.
Се забележува дека руската амбасада во Тел Авив и претставништвото на палестинската национална управа во Рамала „ги преземаат сите неопходни мерки за расветлување на судбината на уште шестмина Руси, кои се водат за исчезнати“, пренесе Интерфакс.
Во соопштението уште еднаш се повикуваат страните во конфликтот да го деескалираат насилството и да го почитуваат меѓународното хуманитарно право, со цел да се избегнат нови жртви меѓу цивилното население.
„Најостро ги осудуваме сите манифестации на екстремизам, тероризам, земање заложници, намерно создавање неподносливи услови за нивниот живот и други акти на насилство врз мирни граѓани, заедно со неселективна употреба на сила за време на воени операции“, се вели во истото соопштение.