Побарувачката за нафта, гас и јаглен се предвидува да продолжи да расте до крајот на оваа деценија, потенцијално создавајќи вишок на фосилни горива, објави ИЕА во својот извештај за Светската енергетска перспектива.
„Во историјата на енергетиката бевме сведоци на ерата на јагленот и на ерата на нафтата“, изјави извршниот директор на организацијата Фатих Бирол.
„Сега забрзано се движиме кон ерата на електрична енергија, која во иднина ќе го дефинира глобалниот енергетски систем кој се повеќе се заснова на чисти извори“, додаде турскиот економист и експерт за енергија.
Во извештајот се наведува дека чистите извори „влегуваат во енергетскиот систем на невидено ниво“, па така лани биле додадени 560 гигавати енергија од обновливи извори.
Речиси два трилиони долари се инвестираат во чиста енергија секоја година, што е речиси двојно повеќе од понудата на фосилни горива, тврди агенцијата со седиште во Париз.
„Со нуклеарната енергија, предмет на обновен интерес во многу земји, изворите со ниски емисии ќе генерираат повеќе од половина од електричната енергија во светот пред 2030 година“, се вели во извештајот.
ИЕА предупредува дека употребата на такви извори е „далеку од рамномерна меѓу технологиите и земјите“.
Извештајот беше објавен еден месец пред Азербејџан да биде домаќин на климатската конференција COP29 на Обединетите нации.