Црна Гора ќе биде домаќин на самитот ЕУ-Западен Балкан на 1 јуни 2026 година. Црногорскиот претседател Јаков Милатовиќ и претседателот на Европскиот совет Антонио Кошта се согласија за ова денес во Брисел, објави црногорскиот национален радиодифузер РТЦГ.
„Следната година, кога ќе славиме 20 години од враќањето на независноста на Црна Гора, добиваме и силна поддршка од нашите европски партнери во организирањето на самитот ЕУ-Западен Балкан на 1 јуни следната година“, рече Милатовиќ по состанокот.
„Ова е знак на голема доверба и секако уште една поддршка што доаѓа од ЕУ кога станува збор за финализирање на нашето пристапување кон ЕУ. 1 јуни следната година ќе биде историски момент – лидерите на сите 27 земји-членки на ЕУ, заедно со претседателот на Европскиот совет (Антонио) Кошта, (Урсула) фон дер Лајен, претседателката на Европската комисија и секако нашите пријатели од Западен Балкан.“
Тој потсети дека неодамна, на самитот на Европската политичка заедница во Копенхаген, ги повикал европските лидери да започнат со изготвување на нацрт-договор за пристапување на Црна Гора во ЕУ.
„Ако сè оди според планот и ако ги затвориме овие 5-6 поглавја што се планирани до крајот на годината, мислам дека ќе бидеме на многу добар пат кон изготвување на нацрт-договор за пристапување и мислам дека ова е исклучително добра вест“, додаде црногорскиот претседател.