Сведочењето на извршниот директор на Meta, Марк Цукерберг, на отворањето на судскиот процес против компанијата во Вашингтон траеше три дена. Тој го заврши сведочењето со насмевка и изјавата дека не би променил ништо и дека повторно би го направил истото.
Цукерберг ги бранеше децениските аквизиции на WhatsApp и Instagram како далекувидни и стратешки инвестиции, не како антиконкурентни потези. Американската Федерална трговска комисија (FTC), во антимонополската тужба која започна на 14 април, се обидува да ги поништи овие договори, тврдејќи дека целта била елиминирање на потенцијални закани за доминацијата на Facebook.
Цукерберг сведочеше речиси 13 часа во текот на три дена. Последниот ден од сведочењето главно беше посветен на одбраната од тврдењата на FTC дека WhatsApp бил купен за да се неутрализира потенцијалната конкуренција. FTC тврди дека Meta стравувала оти апликациите за приватни пораки можат да прераснат во пошироки социјални платформи. Цукерберг призна дека таа идеја му поминала низ глава, но додаде дека тоа сценарио му изгледало исклучително неверојатно по средбата со коосновачите на WhatsApp, Јан Кум и Брајан Актон.
Тој истакна дека двајцата отворено се спротивставувале на социјалните мрежи и рекламирањето, додавајќи дека Кум бил неамбициозен, што го опишал и во интерна електронска пошта, објави The Verge. Цукерберг изјави дека растот на WhatsApp е дел од поширокиот тренд на премин од јавна кон приватна комуникација. Според него, WhatsApp претставува вредна алатка која му помогнала на Facebook да се прилагоди на овие промени, но и „потпора“ во заладените односи на Мета со Apple и Google.
„Секогаш сме загрижени дека ќе не зафркнат“, рече тој, алудирајќи на зависноста на Мета од продавниците за апликации на овие две компании. Тој додаде дека не е сигурен колку WhatsApp реално помогнал во тие односи.
Според внатрешни документи, компанијата предвидела дека WhatsApp ќе достигне 2 милијарди корисници до 2024 година. Цукерберг пред судот изјави дека апликацијата денес има речиси 3 милијарди корисници и дека Мета заработува околу 9,4 милијарди евра годишно од реклами поврзани со WhatsApp, Messenger и Instagram.
FTC тврди дека и купувањето на Instagram било со цел елиминирање на конкуренција. Во времето на аквизицијата, Instagram имал само 10 милиони корисници. Цукерберг тврди дека не го гледал Instagram како закана за Facebook сè до неколку години подоцна, кога платформата достигнала една милијарда корисници.
Тогаш, според неговите зборови, тој предложил да се намали зависноста на Instagram од инфраструктурата на Facebook со цел да се зачува ангажманот на корисниците. Основачите Кевин Систром и Мајк Кригер, наводно, негативно реагирале на тој предлог, по што двајцата поднеле оставки. Сепак, Цукерберг нагласи дека Систром останал во компанијата многу подолго од очекуваното. Тој додаде дека под водство на Мета, Instagram успеал да се справи со проблеми како спамот и значително да порасне – денес со повеќе од 2 милијарди корисници.