Cybertruck на Tesla може да се опише на многу начини, но „хит во продажбата“ сигурно не е еден од нив. Резултатите од продажбата се разочарувачки, а во првата половина од годината дури беше надминат од Ford F-150 Lightning. И покрај ова, се чини дека Tesla не се откажува од сегментот на пикапи, туку подготвува нов, помал модел, пишува Carscoops.
Во текот на викендот, потпретседателот за инженерство на Tesla, Ларс Морави, изјави дека помал пикап може да стане реалност. Таквиот потег би ја отворил вратата за пласман на препознатливиот дизајн на Tesla на поширок, глобален пазар, вклучувајќи ја и Европа, каде што Cybertruck во неговата сегашна форма е едноставно преголем и непрактичен.
На настан за сопственици и инвеститори во Калифорнија, Морави потврди дека идејата за помал, покомпактен пикап се дискутира долго време.
„Секогаш сме зборувале за производство на помал пикап“, рече тој, свесен дека димензиите на Cybertruck се пречка на многу глобални пазари.
Создавањето помал пикап не само што би ја зајакнало позицијата на Tesla во сегментот на пикапи, туку би ги задоволило и потребите што сегашните возила не ги покриваат. Морави наговести дека таквото возило би можело да биде корисно не само за превоз на луѓе, туку и за испорака на стока, особено со развојот на технологијата за автономно возење.
„Дефинитивно во нашето дизајнерско студио активно разгледуваме како можеме да ја задоволиме таа потреба“, додаде Морави, сигнализирајќи дека Tesla сериозно размислува да влезе во сегментот на средни камиони или дури и помали возила за достава.
Во моментов, компанијата нема соодветно возило за оваа намена, а дури и нивните сервисни возила често се мали комбиња со бензински мотори. Нема сомнение дека Tesla би претпочитала да користи свои електрични модели за овие задачи.
Практичноста би можела да биде клучен адут. Продажбата на Cybertruck, по почетниот ентузијазам на раните купувачи, стагнираше. Многумина го гледаат како „лајфстајл“ возило, а не како вистински работен камион. Помал, попрактичен модел би можел да го повтори успехот на Model Y, кој успеа таму каде што поголемиот и поскап Model X не успеа – освојувајќи го масовниот пазар со практичност и прилагодливост кон секојдневната употреба.