На поранешниот американски претседател Џо Бајден му бил дијагностициран агресивен облик на рак на простата кој се проширил на неговите коски, а за неговата состојба зборувал и доктор Вилијам Дахут.
Тој е главен научен директор на Американското здружение за рак и обучен лекар за рак на простата.
Дахут изјави за Би-Би-Си дека ракот е од поагресивен карактер, врз основа на јавно достапните информации за дијагнозата на Бајден.
„Општо земено, ако ракот се проширил на коските, не мислиме дека се смета за рак што може да се излечи“, рече Дахут.
Сепак, тој истакна дека повеќето пациенти добро реагираат на првичниот третман и дека луѓето можат да живеат многу години со дијагнозата.
Дахут рече дека на пациентите со дијагноза како онаа на Бајден веројатно ќе им се понуди хормонска терапија за ублажување на симптомите и забавување на растот на клетките на ракот.
Бајден се повлече од очите на јавноста откако ја напушти Белата куќа и малку се појавуваше во јавноста, а во последните месеци се соочи со прашања за состојбата на неговото здравје.
Тој ги негираше тврдењата дека претрпел когнитивен пад во последната година од неговиот мандат во Белата куќа.
Тој го загуби својот најстар син Бо, кој почина од рак на мозокот во 2015 година.