Руското барање до Европската унија за одобрување на вакцината Спутник В е испратено на погрешна адреса, се посочува во рускиот документ, како и објаснување на европскиот регулатор за тоа како изгледа постапката. ЕУ во јануари негираше дека добила барање за одобрување на Спутник V, но потврди дека се разменуваат научни податоци. Слична изјава беше издадена на 10 февруари.
Рускиот фонд РДИФ, кој е одговорен за продажбата на вакцини во странство, во последните неколку недели беше во спор со Европската медицинска агенција (ЕМА) околу тоа дали испратил барање за одобрување на руската вакцина или не.
Потврдата за барањето е објавена на официјалниот профил на Твитер на вакцината Спутник V, но фотографијата покажува дека е испратена до Мрежата на национални агенции за лекови (ХМА).
Портпарол на ЕМА објави дека ХМА не е дел од процесот на апликација за одобрување на вакцината за коронавирус.
„Подносителите не треба да испраќаат информации до ХМА“, рече портпаролот.
РДИФ сè уште не коментира зошто го испратило барањето до ХМА, но фондот објави дека процесот продолжува.
„Назначен е известувач и очекуваме најава за почеток на инспекцијата многу скоро“, рече портпаролот на фондот.
Оваа потенцијална грешка на РДИФ покажува дека многу земји и производители на вакцини сè уште не се справуваат со комплицираниот процес на одобрување на вакцините.
За повеќето членки на ЕУ, потребно е одобрување од ЕМА. Руската Спутник V е одобрена во 29 земји, од кои едната е во ЕУ, а тоа е Унгарија.