Дури и по повеќе од една година разорни бранови на коронавирус ширум светот, се издвојува интензитетот и размерот на тековната криза во Индија, со очајни пациенти поради недоволно снабдување со кислород, молби за помош во преполните болници и фотографии од тела во вреќи подготвени за погреб.
Покрај тоа, експертите предупредуваат дека официјалните бројки за вирусот од втората најнаселена земја во светот се веројатно уште поголеми.
Но, зошто индиските податоци се сметаат за неточни? Дали овие податоци се помалку точни од податоците објавени од други земји? Кои броеви воопшто даваат добар показател за коронската криза?
Дали Индија го брои секој случај?
Индија не го брои секој случај на коронавирус, но ниту една земја не го прави тоа.
Во светски рамки, официјалните бројки вклучуваат претежно само потврдени случаи, а не вистински инфекции. Некои случаи на коронавирус се пропуштени затоа што некои луѓе заразени со вирусот имаат благи или дури и никакви симптоми.
Колку е ограничено тестирањето, толку повеќе се пропуштаат случаи на коронавирус. Светската здравствена организација (СЗО) вели дека земјите треба да направат од 10 до 30 тестови по потврден случај. Индија спроведува приближно пет тестови за секој потврден случај, според веб-страницата „Our World in Data“. САД спроведуваат 17 тестови по потврден случај. Финска спроведува 57 тестови по потврден случај.
„Сè уште има многу луѓе кои не се тестираат“, вели д-р Прабхат Ја од Универзитетот во Торонто.
„Цели семејства се заразени. Ако едно лице е тестирано дома и пријавило позитивно, а сите други во куќата почнуваат да имаат симптоми, очигледно е дека имаат КОВИД-19“, рекол Ја, додавајќи дека во тој случај другите членови на семејството обично не се тестираат.
Тој проценува, врз основа на претходните податоци во Индија, дека реалниот број на заразени може да биде десет пати поголем од официјалните извештаи.
Што е со починатите?
Мртвите се подобар показател за обликот на кривата на пандемијата, вели докторот, но и тука има проблеми со податоците.
„Најголемата двосмисленост е во тоа што се случува во рурална Индија“, рекол тој.
На село, луѓето често умираат дома без лекарска помош, а овие смртни случаи се потценуваат. Семејствата самостојно ги погребуваат или кремираат своите најблиски, без официјално да ги бележат овие случаи.
Седумдесет проценти од смртните случаи во земјата од какви било последици се случуваат во рурална Индија, во споредба со која било претходна година.
Многу земји со ниски и средни примања имаат слични податоци за бројот на смртни случаи, рекол Ја, но Индија може да се справи подобро.
„Тоа е земја која има вселенска програма. Само броењето на мртвите е основна функција“, вели тој.
„Индија треба да оди многу, многу подобро“.
Дали е важно?
Познавањето на големината и обемот на пандемијата и како таа се менува им помага на владите и здравствените власти да ги испланираат своите одговори.
Дури и со познати проблеми со податоците, траекторијата на случаи со Ковид-19 и смртни случаи во Индија е алармантен потсетник за тоа како вирусот може да се прошири низ главно невакцинирана популација кога ќе бидат укинати мерките на претпазливост.
„Она што се случува во Индија е важно за целиот свет“, рече др. Амита Гупта, претседателка на Институтот Џон Хопкинс во Индија. „Ние се грижиме од хуманитарна перспектива, перспектива на јавно здравје и перспектива на здравствена безбедност“.