Американскиот претседател Доналд Трамп размислува за забрана за виза за бразилските граѓани за време на Светското првенство во фудбал во 2026 година, кое ќе се одржи во САД, Канада и Мексико.
Според извештајот на „CNN Brazil“, мерката, доколку се усвои, би можела да спречи илјадници бразилски навивачи да присуствуваат на натпреварите на нивната репрезентација на американска почва. Според истиот извор, бразилските фудбалери, кои често имаат повеќе државјанства и играат за клубови низ Европа, веројатно нема да бидат засегнати од евентуалното ограничување на визите.
Иницијативата е дел од пошироката имиграциска политика на Доналд Трамп и политичкиот притисок врз официјален Бразил, поради судењето на поранешниот претседател Жаир Болсонаро, чиј сојузник е. Овој контекст е поврзан и со економски одлуки: на 9 јули 2025 година, Трамп објави воведување на 50 проценти царини за увоз од Бразил, нарекувајќи го судењето на Болсонаро „лов на вештерки“.
Во оваа прилика, сегашниот претседател на Бразил, Луиз Инасио Лула да Силва, изјави дека „Бразил нема да прифати наметнувања“ и оцени дека Трамп е избран за претседател на Соединетите Американски Држави, а не за „Цар на светот“.
Извештаите покажуваат дека некои членови на бразилскиот Сенат веќе се соочиле со ограничувања при обидот да влезат во Соединетите Американски Држави, што би можело да укаже на постепено заострување на визниот режим.
ФИФА и Бразилската фудбалска конфедерација досега официјално не ги коментираа овие обвинувања. Сепак, неименувани извори блиски до ФИФА тврдат дека се разгледуваат разговори со американските власти за да се спречат потенцијални компликации пред Светското првенство. Некои коментатори во спортската заедница и медиумите одат чекор понатаму, шпекулирајќи за можноста за преместување на некои натпревари во Канада или Мексико, иако финалето на турнирот, според сегашниот план, сигурно би се одржало на територијата на САД.
Организациите за човекови права, вклучително и Хјуман рајтс воч, изразија загриженост дека потенцијалните забрани за патување би можеле да ја загрозат инклузивноста и универзалниот дух на Светското првенство.
Администрацијата на Трамп претходно беше критикувана поради нејзините извршни наредби со кои се ограничува патувањето за граѓани од повеќе од десетина земји, вклучувајќи ги Иран, Сирија и Судан.
ФИФА изјави дека „светот ја поздравува Америка“ и изрази надеж дека, во соработка со сите засегнати страни, ќе се најде решение што ќе овозможи првенството да се одржи непречено во согласност со принципите на спортски дух и отвореност.