Американскиот министер за финансии Скот Бесент и главниот трговски преговарач Џејмисон Грир ќе се сретнат овој викенд во Швајцарија со кинескиот вицепремиер Хе Лифенг на разговори што би можеле да претставуваат прв чекор кон решавање на трговската војна.
Веста за состанокот, објавена од Вашингтон доцна во вторникот, а подоцна потврдена од Пекинг, донесе олеснување на пазарите потресени од бранот царини наметнати од американскиот претседател Доналд Трамп.
Средбата со кинескиот вицепремиер доаѓа по месеци ескалација на тензиите што доведоа до воведување царини за трговија меѓу двете најголеми економии во светот во износ што далеку надминува 100 проценти. Се очекува двете страни да разговараат за намалување на широко наметнатите тарифи, изјавија за Ројтерс два извори запознаени со планирањето.
Тие, исто така, ќе разговараат за елиминацијата на царините за одредени производи, политиката на САД за прагот „de minimis“ и листата за контрола на извозот на САД, велат изворите.
Вашингтон и Пекинг со месеци водат игра на мачка и глушец околу царините, при што ниту една страна не сака да изгледа дека попушта во трговската војна што ги потресе глобалните пазари и ги наруши синџирите на снабдување.
Канцеларијата на трговскиот претставник на САД и Министерството за финансии соопштија дека Грир и Бесент ќе патуваат заедно во Женева во четврток, а ќе се сретнат и со швајцарската претседателка Карин Келер-Сатер за да разговараат за преговорите за трговски реципроцитет.
По американското соопштение, портпаролот на кинеското Министерство за трговија потврди дека Кина се согласила да се сретне со американските претставници.
„Врз основа на целосно разгледување на глобалните очекувања, кинеските интереси и барањата на американската индустрија и потрошувачи, Кина одлучи повторно да соработува со САД“, се вели во кинеското соопштение.
Ова е прва средба меѓу високи кинески и американски претставници откако американскиот сенатор Стив Дејнс се сретна со премиерот Ли Ќијанг во Пекинг во март.
Пекинг во голема мера одржуваше провокативна реторика бидејќи тензиите се зголемија во последните недели, ветувајќи дека никогаш нема да се поклони пред дополнителните царини од 145% на Трамп, кои кинеската пропаганда ги спореди со „пиење отров“.
Економистите предвидоа дека царините на Трамп врз Кина и десетици други земји би можеле нагло да го намалат глобалниот раст, додека јапонската инвестициска банка Номура минатата недела предупреди дека Кина би можела да изгуби до 16 милиони работни места.
Бесент за „Фокс њуз“ изјави дека двете страни ќе се договорат „за што да разговараат“ за време на состанокот во сабота.
„Видете, имаме заеднички интерес ова не е одржливо. А 145%, 125% е еквивалентно на ембарго. Не сакаме да се разделиме. Она што го сакаме е фер трговија“, рече Бесент.