Основното и Вишото јавно обвинителство во Нови Сад на 6 ноември соопшти дека по нередите на протестот во тој град, уапсени се вкупно девет лица, додека по едно се трага.
Според соопштението, шестмина уапсени се осомничени за насилничко однесување на спортски настан или јавен собир, едно за уништување и оштетување туѓ имот, едно за напад на службено лице и едно за предизвикување општа опасност.
„Во соработка со Полициската управа во Нови Сад и другите надлежни инспекциски служби, ги преземаме сите мерки и дејствија согласно законот, со цел расветлување и гонење на сторителите на горенаведените кривични дела“, соопштија од обвинителството.
Претходно, помошник директорот на полицијата Драган Васиљевиќ во изјава за Српската радио-телевизија изјави дека се идентификувани 12 лица кои направиле немири за време на протестот.
Според него, во немирите полесно се повредени десет полицајци и двајца граѓани.
Немири избија по протестот на 5 ноември, на кој се бараше одговорност од властите за смртта на 14 лица во уривањето на настрешницата на железничката станица во тој град. По првичниот собир пред железничката станица во Нови Сад, демонстрантите во протестна колона пристигнаа пред Градското собрание.
Тогаш групи мажи, главно со маски и качулки, почнаа да фрлаат камења и други предмети кон седиштето на градската власт. Тие ја скршиле влезната врата и прозорците, а полицијата одговорила со солзавец од Градското собрание.
Судирите траеја речиси три часа, а продолжија на улиците во близина на Градското собрание.
Полицијата приведе дел од учесниците во нередите, а опозициските партии и некои невладини соопштија дека се уапсени и мирни демонстранти.