Не може креаторот на проблемот да биде дел од решението на истиот, изјави Димитриевски во гостувањето на „Тема на денот“ на Сител телевизија
„Креаторот на проблемите не треба да биде составен дел и на решението на проблемите, потенцира претседателот на Движењето ЗНАМ – За наша Македонија и градоначалник на Куманово, Максим Димитриевски во Тема на денот на телевизија Сител.
„ Да го земам за пример најконтроверзниот закон којшто е на сила, а тоа е Казнениот закон кој беше донесен по иницијатива токму на луѓето коишто и денеска од страна на партијата којашто ја претставува г-н Филипче се во парламентот. Тоа се истите луѓе кои го донесоа тој контроверзен закон кој дозволи амнестија на голем број на луѓе од претходната власт, а исто така и на добар дел на луѓето од периодот на владеењето на Никола Груевски“, рече тој.
Во однос на потребата од единство Димитриевски потсети дека ЗНАМ направи Национална платформа која ја понуди на сите граѓани.
„Мене ми е драго Платформата понудена од ЗНАМ стана дел на владината платформа на настапување, со тоа што значи дека нашите иницијативи се прифаќаат. Од друга страна, веднаш по објавувањето на таа Национална платформа беше отфрлена токму од самиот господин Филипче и претставниците на Социјалдемократскиот сојуз, а денес се повторно на нашите ставови“.
Димитриевски потенцира дека кога станува збор за државните интереси потребно е изнаоѓање на компромиси и постигнување на консензус и додаде дека имаме легитимна влада со апсолутно мнозинство во Парламентот која е стабилна и носи одговорност да изнаоѓа решенија.
„Сметам дека ресорите со кои во моментов менаџираат кадри од ЗНАМ во целост ја вршат својата работа. Денеска гледаме чисто лицемерие со кое г-н Филипче сака да постигне ефект на самопрогласен лидер на опозицијата, а е само претседател на политичка партија во опозиција, а самата опозиција има голем број на претседатели, па не исклучувам можност во иднина и останатите да побараат вакви форми на дискусија, дијалог, што е здраво за развојот на демократијата во државата“, рече Димитриевски.
Запрашан дали е за или против одржување на лидерски средби, тој рече дека има воспоставена форма во државата и тие се практикувале во одредени кризни моменти, но сериозен епилог од тие видувања немало. Димитриевски појасни дека дијалог може да има, но одговорноста за сите постапки ја презема власта. Тој додаде дека Движењето ЗНАМ – За наша Македонија како учесник во владата ќе работи и функционира со преземање на целосната одговорност пред граѓаните за сите сегашни и идни решенија во државата.
На прашањето дали е владата стабилна и има ли проблем во комуникацијата, Димитриевски рече:
„Нормално е пред избори да се разгорува реториката. Она што е битно е дека владата и владините партнери се стабилни. Ние од аспект на ЗНАМ своите забелешки кога ги имаме му ги претставуваме на мандатарот и на работната група во која учествуваме како политички субјект и разговараме, преговараме и ги усогласуваме политиките, но ја следиме и реализацијата на владината програма и основните принципи и начела врз кои почива договорот за поддршка на владината програма.“
Во однос на локалните избори Димитриевски потенцира дека е Движењето ЗНАМ – За наша Македонија најави дека ќе излезе со свои листи за советници.
„Разговараме со нашиот партнер за взаемна поддршка на кандидатите во сите општини каде ќе ги истакнеме како кандидати на ВМРО -ДПМНЕ или кандидати на ЗНАМ и уште во првиот круг ќе ги поддржиме едногласно. Разговараме и кога ќе имаме епилог ќе ја запознаеме јавноста. За Куманово, кумановчани најдобро знаат кое е најдоброто решение за Куманово и не сум оптоварен со ова прашање, бидејќи за номинацијата ќе одлучат партиските органи и тела во Куманово“, рече Максим Димитриевски во гостувањето во Тема на денот на телевизија Сител.