Време е Македонија да се сврти во друга насока и да работи во интерес на граѓаните. Мислам дека колегите од ВРЕДИ многу грешат ако сметаат дека со овие гестови ќе иницираат дестабилизација на Владата или излегување на ЗНАМ од Владата грешат, изјави претседателот на Движењето ЗНАМ – За наша Македонија и градоначалник на Куманово, Максим Димитриевски, во врска со повторното истакнување на албанското знаме со иста големина како и македонското, на координативен состанок одржан во Владата на РСМ.
– Ние сме значителен, ние сме подеднаков партнер во власта. Ние за оваа власт имаме разговарано со ВМРО – ДПМНЕ, ги имаме прво изедначено нашите прво идеолошки разлики, а дополнително и дадовме и поддршка на владината програма. Во континуитет со учество на нашите министри во власта истата ја реализираме, беше дециден лидерот на ЗНАМ, во вестите плус на Канал 5 во однос на прашањето дали ЗНАМ се чувствува како не битен фактор во Владата?
Според мене, нагласи Димитриевски, се работи за постизборен маркетинг, што се обидуваат да го продадат на својот електорат и да се прават поголем католик од Папата. Нагласи дека постојат закони и надлежни институции, кои треба да постапуваат кога законите се кршат.
Во овој случај истакнување на знамето на етничките заедници воопшто не ми пречи, но точно е пропишано како се истакнува и каде. Во овој момент тоа се прави во Владата и мислам дека следниот потег ќе биде да се разговара на седница на Владата за ова прашање. Ако продолжи самоиницијативата од нивна страна, ако сте самовластие, тогаш не ви е место во Владата, бидејќи вие како власт треба да покажете на граѓаните како се почитуваат законите, истакна лидерот на ЗНАМ.
На прашањето колку е стабилна коалицијата и колку е долгорочно одржлива, Димитриевски посочувајќи дека не се работи за преписки со ВРЕДИ, туку за ставови, истакна дека ако вака продолжи владиниот партнер, како што рече, мислам дека ќе направи круцијална грешка, а тоа е губење на поддршката од граѓаните на следните локални избори. Им порача дека ВРЕДИ треба да се насочи на економија, на реформски процеси, на функционалност на државата, на нешто сосема спротивно од тоа што го правеа, подвлече, нивните претходници,а доаѓаат од редовите на ДУИ.