Директорката на американската национална разузнавачка служба, Тулси Габард, сега тврди дека Иран би можел да произведе нуклеарно оружје „во рок од неколку недели“.
Во март, таа пред сенатскиот комитет изјави дека Иран не развива нуклеарно оружје. Откако претседателот Доналд Трамп изјави дека таа не е во право, Габард ги обвини медиумите дека ги извртуваат нејзините зборови и сега вели дека верува оти Иран би можел да изгради нуклеарно оружје за неколку недели.
Трамп инсистира дека Иран собрал „огромни количини материјал“ и дека би можел да има оружје во рок од неколку недели или месеци, и вели дека САД не смеат да дозволат тоа да се случи.
Во четврток, тој рече дека во следните две недели ќе одлучи дали САД треба да се приклучат на нападот врз Иран. Тој рече дека две недели е „максималниот“ рок што Иран го има за да постигне договор со САД, навестувајќи дека би можел да донесе одлука дури и пред тој рок.
Меѓународната агенција за атомска енергија (МААЕ) претходно овој месец изрази загриженост дека Иран собрал доволно ураниум збогатен до 60% – само еден технички чекор напред од нивото на збогатување од 90% потребно за производство на нуклеарно оружје, за да може да произведе девет нуклеарни бомби.
„Габард греши“
Американскиот претседател Доналд Трамп вчера разговараше со новинарите на пистата до претседателскиот авион „Ер Форс Уан“.
На прашањето какви разузнавачки информации има што укажуваат дека Иран гради нуклеарно оружје, со оглед на тоа што американските разузнавачки служби претходно тврдеа дека немаат докази за тоа, Трамп одговори: „Тогаш моите разузнавачки служби грешат. Кој во разузнавачката заедница го кажа тоа?“
Новинарот одговори дека тоа го кажала директорката на Националното разузнавање, Тулси Габард. „Таа греши“, веднаш возврати Трамп.
Во март, Габард изјави дека американските разузнавачки агенции утврдиле дека Иран не ја продолжил својата програма за развој на нуклеарно оружје, прекината во 2003 година, иако земјата има најголеми залихи на збогатен ураниум откако се направени мерења, а збогатениот ураниум е клучна компонента на таквото оружје.