ДИРЕКТОРОТ на американската разузнавачка агенција (ЦИА) денеска изјави дека рускиот претседател Владимир Путин верува дека САД ќе заборават на Украина, пренесува Њујорк Тајмс.
Вилијам Барнс ова го изјави на Безбедносниот форум што се одржа во Аспен, во американската сојузна држава Колорадо.
„Путин мисли дека Американците страдаат од нарушување на дефицитот на внимание и лесно се одвлекуваат од нешто друго. Мислам дека тој греши овој пат“, рече Барнс, додавајќи дека е тешко да се разберат стратешките одлуки на Путин без да се разбере неговата состојба на умот.
„Тој е бескрајно сомнителен, секогаш е фокусиран на ранливостите што може да ги искористи. Тој не верува во добрата страна на човечката природа“, додаде Барнс.
Директорот на ЦИА рече дека Путин неодамна се потпира на сè помал круг советници, додавајќи дека „не е паметен потег во кариерата“ некој од советниците да му противречи на рускиот претседател.