Стекнувањето право на живеење и работа во странска земја може да биде долг и тежок процес. Сепак, ова можеби не е случај за оние со доволно пари. „Златните визи“ нудат можност за богатите поединци суштински да го купат правото на престој – во одредени случаи не мора ниту да ја напуштат земјата, пишува Euronews.
Популарноста на ваквите визи во Европската унија расте бидејќи луѓето бараат можности да се преселат поради политичките одлуки кои можат да влијаат на нивните права, како што е Брегзит.
Исто така, се очекува дека, поради несреденото политичко и социјално опкружување во САД, би можело да се зголеми бројот на Американци кои бараат златни визи. Компанијата „Get Golden Visa“ во последниот извештај предвидува дека 2022 година би можела да биде најактивната година досега, кога станува збор за ова прашање.
Што всушност се шемите за „златна виза“ и зошто Европската унија покрена прашања за нивната безбедност во последните месеци?
Што е „златна виза“?
Инвестицискиот престој, познат и како „златна виза“, им нуди на луѓето шанса да добијат дозвола за престој во одредена земја со купување куќа таму или со голема инвестиција или донација.
Апликантот мора да има над 18 години, да нема криминално досие и да има доволно средства за да ја направи бараната инвестиција. Има и „златни пасоши“, кои се официјално познати како програми за државјанство по инвестиција. Тие им овозможуваат на странците да стекнат државјанство на истиот начин.
Кога станува збор за земјите од ЕУ, тоа значи уживање во сите придобивки што ги имаат жителите на блокот, како што е, на пример, слободата на движење меѓу земјите.
Што презема ЕУ по повод златните визи и пасоши?
Останаа само неколку места во ЕУ кои сè уште не издаваат „златни пасоши“. Една таква земја е Малта. Минималниот износ на инвестиција е 690.000 евра и овозможува државјанство од 12 до 36 месеци.
Многу други земји имаат програми за „златна виза“. Следат неколку примери за тоа колку точно чини да се овозможи престој во тие земји.
Португалија
Оваа земја многумина ја сметаат за најдобра опција за оние кои се обидуваат да добијат жителство преку инвестиции. Во 2021 година, Португалија имаше повеќе од 10.000 барања за златни визи. Во периодот од јануари до август 2022 година, оваа програма ѝ донесе на земјата 398 милиони евра, покажуваат податоците на португалската национална новинска агенција ЛУСА.
Луѓето можат да купат недвижен имот или да инвестираат. Минималната сума е 280.000 евра, со која може да се купи имот во слабо населени места. За оние кои планираат готовинска инвестиција, тоа може да ги чини до пет милиони евра префрлени во португалска банка или преку одобрена инвестиција.
За да го задржат статусот, граѓаните треба да останат во земјата само околу седум дена секоја година, а по пет години можат да добијат државјанство. Сепак, во последниве месеци, се вели во извештајот, голем број луѓе останале на цедило бидејќи FSA не им ги обновила златните визи.
Шпанија
Властите во Мадрид ја започнаа оваа програма во 2013 година. Таа нуди престој на странци и нивните семејства кои инвестираат во недвижен имот во земјата. Потребна е инвестиција од 500.000 евра за „златна виза“, која вклучува право на живеење, работа и студирање во Шпанија. Иако ова е значително повисоко од португалскиот минимум, има и неколку ограничувања кога станува збор за имотот.
Исто така, виза може да се додели доколку се започнат одредени бизниси во Шпанија, со поседување акции или депозити во банки во вредност од еден милион евра или ако минимум два милиони евра се инвестираат во државни обврзници.
Сепак, одредени политичари бараат да се прекине програмата, велејќи дека тоа влијае на цените на куќите и не е добро за економијата.
Италија
Уште една популарна дестинација за оние кои сакаат да добијат жителство преку инвестиции. Во Италија ова правило е воведено во 2017 година, а граѓаните кои не живеат во ЕУ можат да добијат двегодишна дозвола за престој доколку одлучат да инвестираат во популарната „чизма“.
Минималниот износ е 500.000 евра, а имателите на виза можат да сметаат на истиот статус за нивните семејства и посебен даночен режим. Ако живеат во Италија во период од десет години, тие добиваат право на државјанство.
Грција
Грција нуди „златни визи“ со еден од најбрзите процеси. Квалификуваните странци можат да добијат жителство во рок од 60 дена од моментот на аплицирање.
Претходно, земјата имаше еден од најниските прагови за инвестирање – 250.000 евра потрошени за имот во Грција, но властите одлучија да ја зголемат таа сума на 500.000 за да ја зголемат достапноста на недвижен имот за локалното население.
Од имателите на „Златна виза“ не се бара да бидат во Грција за да го задржат ова право. До крајот на 2021 година, земјата имаше 9.500 апликации, што е една од најголемите бројки во Европа.