Berkshire Hathaway на американскиот милијардер Ворен Бафет моментално поседува повеќе од 325 милијарди долари во готовина, откако оваа година ги продаде акциите на Apple и Bank of America вредни неколку милијарди долари, а оствари и значителна добивка од различни компании. Во исто време, Бафет не направи некои поголеми аквизиции во 2024 година, пишува АП.
Berkshire Hathaway соопшти дека продал повеќе акции на Apple во третиот квартал, откако ја преполовил својата огромна инвестиција во производителот на iPhone минатиот квартал. Уделот, проценет на 69,9 милијарди долари на крајот на септември, ја претставува најголемата поединечна инвестиција на Berkshire, иако вредноста на уделот на Бафет во компанијата е значително намалена во однос на минатата година, кога беше проценета на 174,3 милијарди долари.
Berkshire соопшти денеска дека инвестициските добивки повторно ја подигнале добивката во третиот квартал на 26,25 милијарди долари или 18.272 долари по акција од класа „А“.
Пред една година, нереализираните загуби од инвестиции го оставија конгломератот од Омаха со загуба од 12,77 милијарди долари или 8.824 долари по акција од класа А.
Конечната добивка на Berkshire може значително да варира од квартал до квартал, во зависност од вредноста на инвестициите, без разлика дали компанијата купила или продала нешто, пренесува американската агенција.
Компанијата соопшти дека оперативниот профит паднал за околу 6 отсто на 10,09 милијарди долари, или 7,023,01 долари по акција од класа „А“, во споредба со падот од пред една година од 10,8 милијарди долари, или 7,437,15 долари по акција.
Четворица аналитичари анкетирани од FactSet Research прогнозираат дека Berkshire ќе објави оперативна заработка од 7.335,11 долари по акција од класа „А“.
Приходите на компанијата не се значително променети и моментално изнесуваат 92,995 милијарди долари. Пред една година, Berkshire објави приход од 93,21 милијарди долари, што е пред прогнозата од 92,231 милијарди долари од тројца аналитичари анкетирани од FactSet.
Berkshire поседува асортиман на осигурителни компании, вклучувајќи го Geico, заедно со железницата BNSF, неколку големи комунални претпријатија и разновидна колекција на малопродажни и производствени бизниси, вклучувајќи брендови како Dairy Queen и See’s Candy.