Meta тестира опција за паузирање на Instagram Reels, која (како што сугерира името) ќе им овозможи на корисниците да започнуваат и прекинуваат видеа со едноставно допирање на екранот.
Новата функција е најновиот знак дека Meta сака да ја искористи неизвесната иднина на TikTok во САД, откако популарната апликација за кратко видео беше привремено недостапна претходно овој месец. TikTok, во сопственост на кинеската компанија ByteDance, може да биде трајно забранет на 5 април и сè уште не е достапен во продавниците за апликации на Apple и Google.
Meta потврди дека функцијата моментално е достапна само за мал број корисници ширум светот, но не прецизираше кога би можела да биде достапна за пошироката публика, пренесе CNBC.
Досега, корисниците на Instagram можеа да паузираат Reels само со притискање и држење на прстот на екранот, што бараше поголем напор во споредба со TikTok, каде што беше доволно само едно допирање на екранот. Претходно, едно допирање на Reels го исклучуваше звукот додека видеото продолжуваше да се репродуцира. Но, овој четврток, CNBC можеше да го паузира видеото на Reels со еден допир.
Илјадници корисници веќе оставија коментари и побараа воведување на копче за пауза на Reels на другите социјални мрежи. „Здраво, @instagram, може ли да побарам копче за пауза на Reels? Со почит, тажен поранешен tiktoker“, напиша еден корисник на мрежата X додека TikTok беше недостапен во САД.
Покрај копчето за пауза, Meta овој месец најави и нова апликација за уредување видео наречена Edits, која ќе биде директен конкурент на апликацијата CapCut на ByteDance. Апликацијата Edits ќе стартува во февруари, потврди шефот на Instagram, Адам Мосери. Исто така, според извештајот на CNBC, Meta им плаќа на креаторите да го промовираат Instagram на платформи како TikTok, Snapchat, YouTube Shorts и други апликации за кратко видео.
Акциите на Meta благо пораснаа во четвртокот, еден ден откако компанијата ги објави финансиските резултати за четвртиот квартал кои ги надминаа очекувањата на аналитичарите.