Претседателот на Република Српска, Милорад Додик, изрази верување дека на денешната средба со рускиот претседател Владимир Путин во Сочи ќе бидат постигнати нови договори за иднината.
„Ќе разговараме за моменталната состојба, меѓусебните односи и ќе анализираме што е направено од претходно договореното. Верувам дека ќе бидат постигнати и нови договори за иднината“, изјави Додик за новинарите во Сочи пред почетокот на пленарната седница на годишниот состанок на Меѓународниот дискусионен клуб Валдај, пренесе Срна.
Тој оцени дека Република Српска е „очигледно пречка за глобалните интереси на колективниот Запад“ и дека тоа е случај со децении.
„Српска е создадена во процесот на распаѓање на поранешна Југославија, а тоа беше потврдено со Дејтонскиот договор. Од првиот ден кога Дејтонскиот договор стапи на сила, западњаците почнаа да го уриваат и да се обидуваат да изградат некаква имагинарна Босна и Херцеговина што не е можно“, рече Додик.
Тој истакна дека Западот упорно смета на овие години како време да се заврши, како што велат, недовршената работа на Балканот.
„Она што се случи во поранешна Југославија беше полигон за она што тие имаа намера да го направат во Украина со Русија, а сè што прават денес е многу поучно и за овој регион“, рече Додик.