Постојат бројни начини на кои хакерите и измамниците се обидуваат да добијат информации за кориснички имиња и лозинки, за да ги искористат за разни измами, уцени и слично. Неодамна, предупредуваат експертите за безбедност, корисниците на Инстаграм се на мета на прилично лукава измама.
Имено, измамниците им испраќаат мејлови кои се чини дека се испратени од тимот на Инстаграм, информирајќи ги дека нивните профили се избрани за проверка. Е-поштата доаѓа од адресата „ig-badges“, додека нејзиниот наслов содржи „ig badges info“, а за да биде што поверодостојна пораката, на врвот и на дното на мејлот се наоѓаат логоата на Фејсбук и Инстаграм, пишува „Zimo.hr“.
Е-поштата содржи и линк до веб-страница на која треба да кликнете и да ги внесете вашите информации за да пристапите до Instagram на таа страница. Секако, се работи за лажна страница, па со внесување на вашето корисничко име и лозинка за пристап до Инстаграм, тие информации се предаваат на хакери и измамници. Тие можат да ги користат за да се обидат да пристапат до вашиот профил или да се обидат да пристапат до други услуги, социјални мрежи, е-пошта и слично.
Иако многу луѓе се сомневаат за ваквите „phishing“ пораки и се претпазливи и не отвораат линкови, сепак мал дел од корисниците паѓаат на нив и ги даваат своите информации на измамниците и подоцна се каат.
Инстаграм вели дека процесот на верификација никогаш не оди преку е-пошта, туку само преку апликацијата. Исто така, според „Центарот за помош“ на мрежата, за Инстаграм да потврди нечиј профил, таа личност мора да биде јавна или позната или да станува збор за бренд.