Полскиот претседател Анджеј Дуда во разговор со генералниот секретар на НАТО Марк Руте изјави дека Полска ќе биде подготвена да ги пренесе руските ловци МиГ-29 во Украина под услов земјите од НАТО да ги префрлат своите авиони во полските воздушни бази.
„Имаме уште една ескадрила МиГ-ови, има одлука во врска со тоа. Во моментов користиме авиони МиГ-29 во нашите мисии. Ако ги пренесеме во Украина, постои еден основен услов, а тоа е дека нашето небо мора да биде заштитено“, истакна Дуда.
Според него, полската армија во моментов користи МиГ за да обезбеди безбедност во воздушниот простор, пренесе Униан.
Дуда нагласи и дека Полска секојдневно и помага на Украина, пренесува Танјуг.
Украинскиот претседател Володимир Зеленски претходно изјави дека, и покрај договорот со НАТО, Полска нашла уште една причина да не ги префрли старите ловци МиГ-29 во Киев, наведувајќи дека нема доволно сопствени авиони.
Американската одбранбена ракетна база беше отворена во средата во Реџиков, Полска, а на церемонијата, меѓу другите, присуствуваа и Дуда и Рутe, како и американски претставници.