„За да дојдеме до посакуваната цел, за да станеме дел од современиот европски свет, ние мораме да создадеме простор за различното мислење, кое ќе се соопштува без страв од било какви последици. За таа цел, неделната доза се покажа недоволна, па, еве, стигнавме до дневен “Фокус”. Во таа битка вложуваме се. Го заложуваме сопствениот личен и професионален интегритет. Неделниот “Фокус” ги вложува сопствените средства во дневното издание, за да остане свој, за да можеме секому да му кажеме што мислиме.
Но, многу повеќе, за да ги охрабриме сите граѓани, да знаат дека не се сами во желбата за создавање услови за живот, достоен на времето што го живееме. Со таа мисла, ве повикувам на ова возбудливо патување, кое на крајот ќе покаже дека нема цена, која не вреди да се плати за да се стигне до слободата. Само така ќе стигнеме до Македонија, во која народот ја контролира власта, а не таа него. Која и да е!“, напиша Младенов во колумната со која стартуваше дневниот весник „Фокус“.
Младенов ја почнал новинарската кариера кон средината на 1980-тите во „Млад борец“, каде стана и главен уредник. „Млад борец“ беше предвесник на новинарската пролет во Македонија.
Го основал радиото „Либертас“, а во 1995 година почна издавањето на неделникот „Фокус“, како прв слободен и независен неделен весник во Македонија. Со логото „Неделник на внатрешниот, а, богами, и надворешниот непријател“, „Фокус“, под водство на Младенов стана еден од главните столбови на новото македонско општество. Младенов го градеше брендот „Фокус“ цели 20 години, речиси една половина од неговиот животен век.