Европската централна банка предложи поедноставување на правилата за капиталните бафери на банките во ЕУ, со цел да се намалат некои од сложените регулативи воведени по глобалната финансиска криза без да се олесни целокупното регулаторно оптоварување, објави Ројтерс.
Предлозите вклучуваат поедноставување на капиталните барања и баферите на банките, намалување на рамката за „левериџ“ коефициентот од четири елементи на два и проширување на постојниот режим за малите банки.
Банките долго време се жалеа дека супервизијата станала оптоварувачка, а други, особено во Соединетите Американски Држави, сега се залагаат за намалена регулатива и олабавување на капиталните правила, врз основа на премисата дека супервизијата ја ограничува банкарската активност, потсети агенцијата.
Сепак, ЕЦБ изјави дека поедноставувањето на банкарските правила не може да значи пониски капитални барања, а предлозите објавени денес, кои сè уште треба да бидат одобрени од Европската комисија, се фокусираат на помалку, а не на пониски, барања за износот на капитал што заемодавателите мора да го поседуваат за да ги ублажат потенцијалните шокови.
„Овие предлози имаат за цел да ја поедностават рамката, а воедно да ја зачуваат отпорноста на европскиот банкарски систем“, соопшти ЕЦБ.
Препорака број еден на ЕЦБ е да се поедностави дизајнот на капиталните барања и баферите на банките, познати како „капитален стек“.
ЕЦБ има за цел да ги спои постојните слоеви на бафери во само два: „неослободлив“ бафер и „ослободлив“ бафер, при што вториот претставува дополнителен капитал што банките го поседуваат над минималните барања и што регулаторите можат да им дозволат да го ослободат во време на економски стрес.
Новиот „ослободлив“ бафер би произлегол од спојување на контрацикличниот капитален бафер со системскиот бафер за ризик, кој обично се гради во мирни периоди и се ослободува за време на падови.
ЕЦБ, исто така, сака да ја намали рамката за коефициент на левериџ од четири елементи на два за да вклучи минимален услов од 3% и бафер што може да се постави на нула за помалите банки, се вели во соопштението на банката.
Централната банка, исто така, предложи проширување на таканаречениот „режим на мали банки“, така што повеќе заемодаватели би потпаднале под поедноставни супервизорски барања.
ЕЦБ, исто така, повика на реформа на обемот и методологијата на стрес-тестовите на банките на ниво на ЕУ за да бидат покорисни и од банкарска и од системска перспектива, и предложи европските власти пошироко да ги споделуваат своите податоци едни со други, дозволувајќи им на банките да известуваат само еднаш, меѓу другите мерки.
ЕЦБ, исто така, препорача автоматска реципрочност на макропрудентните мерки, што значи дека макропрудентните мерки на една земја би влијаеле на сите банки во таа земја. Во случај на пропаѓање на банка, ЕЦБ предложи барањата за резолуција што важат за сите банки да бидат поблиску усогласени со оние што важат за глобално системски важните банки.
Препораките, одобрени од Управниот совет на ЕЦБ, сега ќе бидат доставени до Европската комисија на разгледување, а сите реални промени би можеле да траат со месеци, ако не и со години.