Европската инвестициска банка (ЕИБ) денеска објави истражување за банкарскиот сектор во Централна, Источна и Југоисточна Европа (ЦИЈИЕ), кое дава оптимистички прогнози, иако остануваат неизвесности и ризици.
„Побарувачката на населението за кредити е зголемена, а таа закрепнува во делот на фиксните инвестиции на компанијата, пред се благодарение на потребите од обртни средства. По заострувањето во 2020 година и почетокот на 2021 година, условите за кредитирање на населението се олеснија во последните шест месеци, додека тоа не е случај за економијата, особено за малите и средни претпријатија. Поддршката за побарувачката што ја обезбедуваат инвестициските кредити повторно стана позитивна, што укажува на подобрување на економските услови за компаниите“, се вели во соопштението на ЕИБ.
Се додава дека по привремениот пад во 2020 година, работењето на банкарските групи опфатени со истражувањето повторно станало профитабилно.
Околу 60 отсто од анкетираните банки наведуваат дека имаат намера да го одржат својот бизнис во регионот, а 40 отсто да го прошират.
Банките споделиле дека регулаторните и политичките мерки за поддршка на кредитирањето одиграле значајна улога. Оние кои имаат корист од шемите за јавни гаранции наведуваат дека овие програми биле многу ефикасни во продолжувањето на роковите за отплата на кредитите. Банките кои ги користат поволностите за рефинансирање на централната банка веруваат дека овие аранжмани најмногу ги подобриле условите за кредитирање.
Од ЕИБ посочија дека по малото влошување во 2020 година, почна да се подобрува и квалитетот на заемите. Сепак, тоа закрепнување не се очекува да продолжи во следните шест месеци, бидејќи банкарските групи укажуваат на зголемена неизвесност.
„Истражувањето покажува дека меѓународната и националната поддршка се клучни за континуитетот на банкарските групи во регионот на ЦИЈИЕ, по остриот застој поради шокот предизвикан од „Ковид-19“ во 2020 година“, рече главниот економист на ЕИБ – Дебора Револтела.
Таа додаде дека одржувањето на таа силна поддршка сега е од клучно значење за да им се олесни на компаниите пристап до финансии и да се овозможи инвестирање во зелената и дигиталната транзиција.