Европската комисија побара воведување на надомест за обработка на ниво на ЕУ за мали пакети нарачани преку интернет од кинески платформи како што се „Шеин“, „Тему“ и „Алибаба“ уште од 2026 година, повеќе од две години порано од планираното, во обид да се ограничи годишниот прилив на евтини кинески увози од повеќе милијарди евра, објави „Фајненшл тајмс“.
ЕК ги повика европските министри за финансии, кои се состануваат денес, да се договорат за побрзо спроведување на мерката за заштита на локалните трговци на мало од нелојална конкуренција.
„Ова е клучен чекор за да се обезбеди дека Европската Унија ќе ја зајакне својата позиција во услови на брзо менување на трговските реалности. Овој потег би испратил силен сигнал дека Европа е сериозна во врска со зголемувањето на својата конкурентност и обезбедувањето еднакви услови за своите бизниси“, напиша комесарот за трговија, Марош Шефчовиќ, во писмо до министрите, до кое увид имало финансиското издание.
Барањето за забрзување на спроведувањето на мерката уште во првиот квартал од 2026 година означува зацврстување на ставот на Комисијата кон Кина и она што го смета за нефер трговски практики на Пекинг.
Ова доаѓа 10 дена пред самитот на Г20, каде што се очекува европските лидери да покренат низа трговски прашања со кинескиот претседател Си Џинпинг.
Во мај, ЕК предложи да се отстрани прагот од 150 евра за стоки под кои пратките се ослободени од царински давачки од средината на 2028 година и да се воведе такса од 2 евра по пакет. Кинеските продавачи учествуваа со повеќе од 80% од 4,6 милијарди пакети купени од европските потрошувачи минатата година.
„Овој распоред е некомпатибилен со итноста на ситуацијата. Европските индустрии, особено трговците на мало, постојано нагласуваат дека ова нарушување на конкуренцијата мора веднаш да се отстрани. Ќе биде исклучително тешко да им се објасни на нашите бизниси и граѓани зошто ЕУ не може да дејствува побрзо“, напиша Шефчовиќ во своето писмо.
Земјите-членки на ЕУ ќе мора да се согласат за новиот распоред и да преговараат за фиксната царинска давачка што ќе се воведе. Некои земји, вклучувајќи ја и Романија, неодамна воведоа национални такси до 5 евра, принудувајќи ја Комисијата да интервенира, забележува „Фајненшл тајмс“.
„Ова не е техничко прашање, туку прашање на способноста на Европа да дејствува во одбрана на своите економски интереси. Модерна, конкурентна Европа мора да биде способна подобро да ги заштити своите граници за стоки и да одржува фер конкуренција“, истакна и Шефчовиќ.