Сè уште не е јасно што се случило со исчезнатата подморница Титан кога во неделата изгубила контакт со посадата на површината додека била на пат кон потонатиот брод Титаник.
Но, без никаков знак или звук од подморницата повеќе од еден ден, експертите велат дека изгледите не се најдобри и дека има многу работи што би можеле да тргнат наопаку.
Една од можностите е прекин на струја, што би можело да предизвика губење на комуникациите, изјави за Си-Ен-Ен Ерик Фусил, експерт за подморници и вонреден професор на Универзитетот во Аделаида.
Тој додаде дека некои подморници имаат втор, резервен извор на енергија во случај да пропадне примарниот електричен систем, но не е јасно дали Титан имал резервни извори на енергија кога исчезнал.
Понатаму, краток спој може да предизвика пожар во подморницата, што не само што ќе ги уништи системите на бродот, туку и ќе создаде токсичен чад во малиот затворен простор, што претставува огромна опасност за патниците, вели Фусил.
Тој забележува дека со подморниците секогаш постои ризик од поплави и дека на длабочините каде што се наоѓа Титаник, огромниот притисок би предизвикал експлозија кај повеќето пловни објекти.
Титан е опремен со најиновативни безбедносни мерки, што значи дека притисокот во подморницата постојано се следи и дека пилотот на подморницата веднаш добива предупредување доколку нешто не е во ред.
Потоа, постои опасност подморницата поради силните подводни струи и опкружена со остатоците од Титаник на дното на океанот да биде заробена или да ѝ биде блокиран патот, објаснува Фусил.
Потонатиот брод Титаник лежи на длабочина од околу 3.800 метри, опкружен со остатоци по катастрофата што се случи пред повеќе од еден век.
„Делови од потонатиот брод се насекаде. И тоа е многу опасно“, изјави за „Гардијан“ Френк Овен, пензиониран офицер на Кралската австралиска морнарица и директор на проекти за спасување подморници.
Контактот бил изгубен еден час и 45 минути откако подморницата го започнала своето патување, што според него значи дека е многу блиску до дното, или веќе таму.
Титан може да развие брзина од најмноги три јазли, но движењето се забавува додека подморницата оди подлабоко.
Во случај да се заплетка, да ја изгуби моќноста или да ја изгуби комуникацијата, Титан е опремен со тегови што може да се исфрлат во случај на вонредна состојба, што би создало доволно потисок за да исплива на површината.
Оваа подморница има и низа рефлектори, опрема за сигнализација и осветлување што може да ја користи за да привлече внимание кога ќе излезе на површина.
Друго можно сценарио е во трупот на подморницата да дојде до протекување под притисок, во тој случај прогнозата не е добра, вели Алистер Грејг, професор по морски инженеринг на Универзитетскиот колеџ во Лондон.
„Ако Титан потонал на морското дно и не може да се врати со сопствените сили, опциите се многу ограничени“, рече Грејг.
„Дури и ако подморницата е сè уште недопрена, ако е надвор од континенталниот гребен, има многу малку бродови што можат да одат до тие длабочини, а нуркачите сигурно не можат“, заклучува тој.