Помеѓу 2015 и 2024 година, цените на недвижностите во ЕУ се зголемија за 53%, а во некои земји трошоците дури и се зголемија за трипати. Повисоките трошоци за изградба, каматните стапки за хипотеки, ограничената понуда и растот на купување станови како инвестиции доведоа до неверојатни нивоа на цени во одредени земји-членки на ЕУ, објави „Еуроњуз“.
Унгарија забележа најголем раст – становите сега се три пати поскапи отколку во 2015 година. Денес, стан во главниот град Будимпешта чини во просек помеѓу 250.000 и 1,5 милиони евра, пишува Seebiz.
По него следува Исланд, каде што цените се приближно 2,5 пати повисоки отколку во 2015 година. Во главниот регион, Рејкјавик и шесте околни општини, становите се најскапи, со просечна куповна цена од околу 558.000 евра.
Според податоците од Централната банка на Исланд, со зголемувањето на понудата и слабеењето на побарувачката, растот на цените на недвижностите се забавува, иако годишната инфлација на цените на домувањето сè уште изнесуваше 8% во март.
Остатокот од Европа, исто така, забележа значителен пораст на цените на недвижностите во текот на изминатите девет години. Литванија, Португалија, Чешка, Бугарија, Естонија и Полска забележаа повеќе од двојно зголемување на цените.
На дното на листата е Финска, каде што цените на недвижностите не се значително повисоки отколку што беа пред речиси десет години. Сепак, постојат големи разлики во цените на становите помеѓу руралните области и, на пример, Хелсинки.
Според неодамнешниот извештај на „Глобал проперти гајд“, падот на финскиот пазар на недвижности, кој започна во 2021 година и забележа годишен пад на цените од 14%, веројатно го достигна своето дно.
Се очекува економското закрепнување да поттикне постепено зголемување на цените на недвижностите, особено на новоизградените, додека цените на „половни“ станови ќе се зголемат само маргинално – помеѓу 1 и 3% оваа година. Половните станови чинат во просек 4.612 евра по квадратен метар, што значи дека стан од 75 м² вреди околу 345.900 евра, додека во Хелсинки таа сума е поблиску до 400.000–500.000 евра.
Евростат нема податоци за цените на недвижностите во Грција, но според Индексот на станбени недвижности на Централната банка на Грција, цените во урбаните средини се само малку над нивоата од 2008 година.