Екстремно десничарската Алтернатива за Германија (АфД) денеска ја номинираше лидерката на партијата Алиса Вајдел за свој главен кандидат за претстојните избори, со што за првпат антиимиграциската, евроскептична партија да номинира кандидат за канцелар.
Извршниот комитет и регионалните партиски водачи се согласија на состанокот во Берлин дека Алис Вајдел ќе биде главен кандидат на партијата, рекоа учесниците.
„Денес е голем ден за партијата и голем ден за Германија“, рече Вајдел на заедничката прес-конференција со партискиот потпретседател Тино Крупал.
Вајдел ја објасни одлуката на АфД да предложи кандидат за канцелар со тврдењето дека нејзината партија има право на власт, повикувајќи се на анкети. АфД, која беше основана во 2013 година и првпат влезе во парламентот во 2017 година, моментално има меѓу 18 и 19 отсто од гласовите, што ја става на второто место зад конзервативниот блок ЦДУ/ЦСУ со 32 до 33 отсто.
Владејачката Социјалдемократска партија на канцеларот Олаф Шолц во моментов има околу 18 отсто од гласовите.
Трипартиската коалиција на Шолц се распадна на почетокот на ноември, откако канцеларот го отпушти поранешниот министер за финансии Кристијан Линднер (Слободна демократска партија) по неколкумесечни спорови околу економската политика и буџетот за 2025 година.
Канцеларот најави дека планира да одржи гласање за доверба кон крајот на овој месец, што се очекува да доведе до предвремени избори на 23 февруари.