Ќерката на Матија Дедиќ, Лу, се огласи на социјалните мрежи за да се збогува со својот татко по неговата ненадејна смрт на 53-годишна возраст.
Споделувајќи фотографија од нив, Лу му се заблагодари на својот татко во емотивна објава, велејќи дека не може да поверува дека го нема.
„Незамисливо е да те нема, да не те видам повторно, но ќе останам силна затоа што најмногу и се восхитуваше мојата сила. Секогаш велеше дека сум силна лавица, а ти си емотивна риба. Тоа беа некои од нашите омилени теми; астрологија, нумерологија, мистерии, теории на заговор… теми за кои дискутиравме со часови во твојата кујна со кафе и цигари“, започна Лу, која, како и нејзиниот татко, е музичарка.
Таа рече дека токму ова го наследила од Матија: „Сонување, бујна, незапирлива имагинација и филозофирање, барање на поголемата слика и подлабокото значење на сè околу нас.“
„Ти благодарам за сè, за твојата грижа, нежност и љубезност, за животот што ми го овозможи и во кој ме штитеше како капка вода на дланката, твојата единствена ќерка. Ќе ги исполнам нашите соништа и ќе те направам горда, исто како што ме направи мене најгорда на светот затоа што додека растев, ја разбирав и твојата професионална големина“, напиша Лу.
Таа се сети и на своето детство, но зборуваше и за нивната професионална соработка во последните години.
„Како мало дете, те нарекував мајстор, а ти беше навистина неповторлив мајстор во она што го правеше и остави зад себе големо музичко богатство. Во овој за жал прекраток период што го поминавме заедно, успеавме да соработуваме професионално, за што сум бескрајно благодарна, пред сè затоа што знам колку те исполни. Уште еднаш, ти благодарам за сè, а сега одмори, татко мој“, рече таа.
Матија Дедиќ почина во недела во Загреб на 52-годишна возраст. Тој беше еден од најпознатите хрватски џез музичари. Роден е во музичко семејство како син на Арсен Дедиќ и Габи Новак, а во 1997 година дипломирал џез на Академијата за уметности во Грац.
Ќе биде запаметен како врвен пијанист кој остави неизбришлив белег во современиот џез и класичната музика.