Германската армија отпушти девет војници од елитен падобрански полк по истрагите за наводи за десничарски екстремизам, сексуална злоупотреба и злоупотреба на дрога, изјави во средата началникот на армијата, генерал-мајор Кристијан Фројдинг.
Во разговор со новинарите по брифингот на пратениците во одборот за одбрана на Бундестагот, Фројдинг рече дека е покрената постапка за отпуштање против 19 војници од 26-от падобрански полк, една од елитните единици на падобранци во Германија, при што девет војници веќе се отпуштени.
„Во армијата, ние не толерираме сексуална злоупотреба или екстремистичко однесување, а камоли злоупотреба на дрога“, рече Фројдинг.
Истрагата моментално опфаќа 55 осомничени, додаде тој, додека дисциплинските и кривичните постапки се уште се во тек.
Истрагата се фокусира на полк со седиште во западниот германски град Цвајбрикен, каде што војниците се обвинети за низа прекршоци, вклучувајќи нацистички поздрави, антисемитизам, сексуално насилство и злоупотреба на дрога.
Фото: Јутјуб/Принтскрин/
Bundeswehr
Во 16 случаи, досиејата се префрлени на цивилни обвинители. Во војската се изречени дополнителни дисциплински мерки, вклучително и привремени суспензии.
Случајот првпат излезе на виделина во декември кога „Франкфуртер алгемајне цајтунг“ објави за сериозно недолично однесување во полкот, предизвикувајќи пошироко национално внимание.
Подоцнежните извештаи открија дека жалбите во единицата претходно стигнале до парламентарниот омбудсман, што покрена прашања зошто целосниот обем на проблемите излегле на виделина дури неколку месеци подоцна.
Аферата предизвика критики во парламентот во врска со внатрешните контроли на војската во време кога Германија се стреми брзо да ги прошири и модернизира своите вооружени сили како одговор на војната на Русија во Украина и барањата на НАТО за поголема подготвеност.
Фројдинг ги призна недостатоците во начинот на кој се спроведени првичните истраги, велејќи дека некои истраги не биле спроведени со потребната длабочина и дека дисциплинските одговори понекогаш биле непропорционални.
Командата на армијата и Министерството за одбрана внимателно го следат случајот од средината на 2025 година, додаде тој.