Авиокомпанијата „Ер Србија“ најави дека од среда, 17 мај, ќе воспостави директни летови меѓу Белград и Чикаго, кои не постојат повеќе од 30 години.
Новата линија е продолжение на проширувањето на бизнисот во Соединетите Американски Држави (САД), а летовите од Белград до Чикаго ќе се реализираат двапати неделно до 11 јуни – во среда и сабота, додека од 12 јуни ќе се реализираат летови три пати неделно – во понеделник, среда и сабота.
Летовите од Белград до меѓународниот аеродром „O’Hare“ во Чикаго ќе траат околу 11 часа и ќе бидат управувани со авиони Ербас А330 од долгите релации на флотата на „Ер Србија“.
Националната авиокомпанија смета дека новата линија ќе значи подобро поврзување на регионот со Чикаго, третиот по големина град во САД, по Њујорк и Лос Анџелес, каде што живеат голем број луѓе по потекло од овој крај.
Тие изјавија дека преку Белград ќе овозможат добри врски меѓу Чикаго и другите градови во нивната мрежа, како Атина, Виена, Берлин, Болоња, Букурешт, Дубровник, Истанбул, Ларнака, Љубљана, Прага, Пула, Подгорица, Рим, Сараево, Скопје, Софија, Тиват, Венеција, Загреб.
Благодарение на меѓулиниската соработка со компаниите JetBlue и American Airlines, „Ер Србија“ ќе може да им понуди подобри врски на патниците кои продолжуваат со своите патувања од Чикаго и Њујорк до други точки во Северна Америка, се вели во официјалното соопштение.