ЕУ ги продолжи санкциите против Белорусија за уште една година

од Stefanija Kuzmanovska

Советот на ЕУ денеска одлучи да ги продолжи рестриктивните мерки против Белорусија за една година поради репресијата во таа земја и поддршката на Минск за руската војна во Украина.

Како што соопшти Советот, одлуката е донесена врз основа на годишниот преглед на рестриктивните мерки и со оглед на континуираната репресија и драстичното влошување на состојбата со човековите права во Белорусија, како и постојаното вклучување на земјата во руската агресија врз Украина.

Од август 2020 година, ЕУ воведе неколку последователни рунди на поединечни и секторски санкции за одговорните за репресијата и кршењето на човековите права во Белорусија.

Со ова ЕУ, според Советот, испратила сигнал до одговорните политички и економски актери дека нивните постапки и поддршка на режимот во Русија имаат цена.

Индивидуалните рестриктивни мерки вклучуваат замрзнување на имотот и забрана за ставање на располагање средства. Поединци дополнително подлежат на забрана за патување.

Во моментов на листата на санкционирани има 233 лица, меѓу кои и белорускиот претседател Александар Лукашенко и 37 ентитети.

Белорусија, исто така, ќе продолжи да биде предмет на насочени економски санкции, вклучувајќи ограничувања на финансискиот сектор, трговијата, стоките со двојна употреба, технологијата и телекомуникациите, енергијата, транспортот итн.

Слични содржини