Покрај постигнување на конечен и правно обврзувачки договор меѓу Белград и Приштина, Европската унија има намера да обезбеди решенија за договори што не се спроведени во претходниот технички и политички дијалог, пишува „Коха“.
Нерешените прашања ќе бидат решени паралелно со преговорите за сеопфатен договор, рече портпаролката на ЕУ за надворешна и безбедносна политика Набила Масрали, пренесува „Косово онлајн“.
Намерата е да се создадат механизми што ќе го следат спроведувањето на претходно потпишаните договори и оние што ќе се постигнат, а официјални лица од Брисел велат дека сите нерешени прашања ќе бидат решени.
„ЕУ, како модератор на дијалогот, ќе соработува со земјите за сеопфатна нормализација на односите меѓу Србија и Косово, решавајќи ги сите нерешени прашања. Сите прашања што треба да се дискутираат во дијалогот се клучни за сеопфатната нормализација на односите меѓу Србија и Косово. ЕУ и нејзините земји-членки очекуваат страните да ги спроведат сите претходни договори. Нерешените прашања од минатите договори ќе бидат решени паралелно со преговорите за сеопфатен договор“, рече портпаролот на ЕУ за надворешна и безбедносна политика Набила Масрали.
„Коха“ посочува дека за воспоставување механизми за следење на спроведувањето на можниот договор било разговарано и на состаноците што косовскиот претседател Хашим Тачи ги имал со официјални лица од Брисел.
Прашањето на механизмите за следење на спроведувањето се споменува и во документот што Тачи го состави за државната делегација во јануари 2019 година, што беше одбиено од Уставниот суд.
„Очигледно е дека Европската унија ќе остане гарант за спроведување на овој договор и ќе бидат воспоставени посебни заеднички механизми за следење на спроведувањето“, се вели во документот.
Кабинетот на премиерот Авдулах Хоти не соопшти дали поддржува формирање на тело кое би го следело спроведувањето на договорот.
Недостатокот на механизам за набљудување го отежнува мерењето на нивото на имплементација, и како резултат на тоа, многу договори не беа спроведени, иако беа преговарани неколку пати.
Оние што се запознаени со ситуацијата велат дека сегашниот пристап што го применува ЕУ создал ситуација во која страните ги толкуваат договорите како што сакаат и меѓусебно се обвинуваат за нивното неисполнување, пренесува „Косово Онлајн“.
Од постигнатите 33 договори, два се клучни, што Белград и Приштина не ги спроведоа, додека Брисел упорно бара нивно спроведување.
Како што се наведува, Белград спречил отворање на мостот над реката Ибар во Митровица, додека Приштина не ги исполнила своите обврски при формирањето на Заедницата на српските општини.