Европската унија најави дека Приштина треба да даде доволно време за спроведување на правилото според кое Србите кои живеат на северот на Косово треба да ги пререгистрираат своите автомобилски таблички, пренесе Ројтерс.
Портпаролот на Европската комисија рече дека е важно да се остави доволно време за реализација на планот и дека тој е подготвен и спроведен во тесна консултација со граѓаните засегнати од одлуката и во согласност со добрата европска практика.
„Заклучоците за слободата на движењето за 2016 година вклучија многу подолги временски рамки за пререгистрација, што треба да обезбеди насоки за тој процес“, рече портпаролот.
Портпаролот истакна дека ЕУ апелирала до двете страни да го користат дијалогот со посредство на ЕУ како платформа за решавање на сите отворени прашања меѓу нив, вклучително и прашањето за регистарските таблички.