Европската комисија денес соопшти дека разгледува итно одобрување на вакцините против ковид-19 како побрза алтернатива на построгите условни одобренија кои се спроведени досега.
Овој потег ќе означи голем пресврт во одобрувањето на вакцините, бидејќи тоа вклучува процедура што ЕУ ја смета за опасна, а пред пандемијата на ковид-19 беше резервирана само за исклучително одобрување на лекови на национално ниво за неизлечиво болни пациенти, вклучително и лекување на рак.
Потенцијалните промени доаѓаат во време кога ЕК и европскиот регулатор на лекови се под зголемен притисок поради, како што велат некои, бавното одобрување на вакцините, што придонесе за побавно воведување на вакцини против ковид-19 во блокот од 27 држави, во споредба со САД и Британија.
„Подготвени сме да разговараме со земјите-членки за сите можни начини за навистина да го забрзаме одобрувањето на вакцините“, рече портпаролот на Комисијата на прес-конференција.
Една од можностите може да биде „итно одобрување на вакцината на ниво на ЕУ со заедничка одговорност меѓу земјите-членки“, рече портпаролот, додавајќи дека работата на тоа би можела да започне многу брзо доколку владите на ЕУ ја поддржат идејата.
Сè уште не е познато дали процесот на одобрување за итни случаи ширум ЕУ, доколку е договорен, ќе ги имплицира истите услови како и одобренијата за итни случаи издадени на национално ниво, изјави портпаролот на Комисијата за „Ројтерс“.
Европската агенција за лекови (ЕМА) во моментов не е во можност да издаде итни одобрувања.
Оваа постапка се користеше во април за првично да се овластат лекарите да го користат антивирусниот лек Ремдесивир на Гилеад како лек против ковид-19. Лекот подоцна доби условно одобрување од ЕМА.