Европската унија денеска најави воспоставување нови рамковни услови за воведување санкции против Русија поради нејзините обиди да ја дестабилизира ситуацијата во земјите-членки на ЕУ.
„Советот на ЕУ денеска воспостави нови рамковни услови за примена на рестриктивни мерки како одговор на дестабилизирачките активности на Русија во странство. Овие нови рамки ќе и овозможат на ЕУ да таргетира физички и правни лица вклучени во акции и политики на владата на Руската Федерација кои го поткопуваат јадрото на ЕУ и нејзините земји-членки, нивната безбедност, независност и интегритет, како и вредностите на меѓународните организации и трети земји“, се вели во соопштението објавено на веб-страницата на Советот на ЕУ.
Како што е наведено, новите законски услови ќе и дадат можност на Европската унија да одговори на различни хибридни закани, вклучувајќи мешање во изборните процеси и поткопување на демократските институции, закани и саботажа на економските активности и јавните услуги или критичната инфраструктура.