Земјите од ЕУ ќе воведат санкции против 30 руски функционери поради смртта на водечкиот критичар на Кремљ, Алексеј Навални, изјави високиот претставник на Европската унија за надворешна политика и безбедност, Жозеф Борел.
„Се договоривме за санкции за одговорните за убиството на Алексеј Навални“, изјави Борел по состанокот на министрите за надворешни работи на ЕУ.
Официјални лица рекоа дека Европската унија ќе ги следи Соединетите Држави и Велика Британија во наметнувањето забрани за патување и замрзнување на имотот на руските службеници одговорни за третманот на Навални.
Имињата на санкционираните од ЕУ ќе бидат објавени во наредните денови.
Договорот за санкционирање на одговорните за смртта на Навални доаѓа откако рускиот лидер Владимир Путин освои нов шестгодишен мандат на изборите кои Западот ги прогласи за „лажни“.
Навални, најистакнатиот руски опозициски лидер, почина во арктичкиот затвор во февруари, каде што издржуваше строга затворска казна.